Fagbréf

Fagbréf er staðfesting á færni þinni í starfi.

Fagbréf atvinnulífsins er afrakstur samvinnu Fræðslumiðstöðvar atvinnulífsins (FA), Samtaka atvinnulífsins (SA) og Alþýðusambands Íslands (ASÍ). Rafmennt annast framkvæmd matsins en fagbréf atvinnulífsins eru gefin út af FA sem vottar að réttri aðferðafræði hafi verið beitt við framkvæmd mats og starfsþjálfunar.

Í desember 2024 var undirritaður nýr kjarasamningur á milli Samtaka atvinnulífsins og Rafiðnaðarsambands Íslands fyrir starfsfólk í tæknigreinum en í samningnum er kveðið á um að í stað launataxta (annarra en grunnlauna) og tengdra ákvæða kjarasamnings, s.s. um álagsgreiðslur vegna ábyrgðar, menntunar og annarra þátta, sé heimilt að innleiða hæfnilaunakerfi samningsaðila í einstökum fyrirtækjum.

Í hæfnilaunakerfinu verður hvoru tveggja kveðið á um viðmið og efnisþætti sem lagðir verða til grundvallar launum og hvernig verður staðið að mati vegna launaþróunar.

Hvor aðili; starfsfólk á grundvelli meirihlutastuðnings eða fyrirtæki, getur farið fram á viðræður um upptöku nýs launakerfis.

Hvaða tæknistörf eru metin til fagbréfa ?

Kvikmyndastjórn Ljóstækni Ráðstefnutækni

Tímabundin Burðarvirki Sviðsstjórn

Hvernig fer mat til fagbréfs fram ?

1. Umsækjandi sækir um mat til fagbréfs fyrir viðkomandi starf og skilar inn sjálfsmati fyrir starfið.
2. Boðað er til raunfærnimatsviðtals með matsaðila þar sem hæfni umsækjenda er metin gagnvart matslista starfsins.
   • Ef tilefni þykir til er verkefni eða próf lagt fyrir umsækjanda til staðfestingar á hæfni.
3. Í framhaldi fer fram þjálfun og fræðsla sem tekur mið af niðurstöðum matsins nema öllum hæfniviðmiðum sé náð.
4. Þegar öllum hæfniviðmiðum starfsins er náð er færnin staðfest með Fagbréfi atvinnulífsins fyrir viðkomandi starf.

Hvað kostar að fara í mat ?

Félagsfólk í Félagi Tæknifólks fær matið að fullu niðurgreitt.

Aðrir umsækjendur greiða 80.000.- kr fyrir hvert fagbréf og 16.000.- fyrir hvern hæfniþótt sem þarfnast eftirfylgni og þjálfunar.

Hægt er að sækja um styrki til niðurgreiðslu á gjöldum til menntasjóða viðkomandi stéttarfélaga.

Hvernig fer skráningin fram ?

Skráning fer fram rafrænt á Innu í gegnum skráningarhnapp á upplýsingasíðu hvers starfs fyrir sig.

Leiðbeiningar fyrir skráningu/umsókn á innu